相信好多人都知,如果T恤洗多几次,衫领会慢慢变形,渐渐变得唔美观。日本电视节目《ZIP!》指,T恤喺晒衫过程中,会因为水份积聚,令到衫领部份变形。
所以节目邀请当地洗衣服务公司最高技术负责人神崎健辅先生,神崎健辅先生有「洗衣博士」之称,佢话有一个小技巧可以对付「荷叶边」,3个简单步骤就令T恤变返正常。
首先将鬆咗嘅T恤衫领反覆摺成波浪形状,再将佢浸入冰水一分钟。然后用以按压方式将衫领水份尽量挤出。记得!记得唔好「扭乾」,如果唔係衫领又会再变形。
之后将T恤放喺枱面摊平,由下而上用手指将衫领推平,重複做几次。
最后,用熨斗由下而上将衫领熨平,唔需要熨乾,最好维持少少湿度。再将T恤平放自然风乾,但记得唔好挂起!
有唔少网民都试咗呢个方法,T恤虽然冇变成新嘅一样 ,但都令衫领唔再变形。好多网民仲话,晾衫时,可以用两个衫架将T恤水平晾起,咁样水份嘅重量就唔会搞到衫领位变形啦。